+0 به يه ن

عشقين ائله‌سه عالمي قان، بيلمه‌يه جكسن!
يوز دفعه دئسه‌م، مطلبي قان، بيلمه‌يه جكسن!

باخ سينه مه، مين ياره ووروب تيرِ نگاهين
افسوس كي، اي قاشي كمان، بيلمه‌يه جكسن

آخر كي قوجالتدي مني، درِد و غم عشقين
پير اولماسان، اي تازه جوان، بيلمه‌يه جكسن

بي‌مهرسن، عالمده، رُخِ آلينا حسرت
وئرسه‌م‌ده اگر هيجرده جان، بيلمه‌يه جكسن

مجنون كيمي، زنجيرِ سرِ زولفينه باغلي
اولسام داخي، رسواي جهان، بيلمه‌يه جكسن

توتسام، گؤزه‌ليم، دامنيني، اينجيمه منده‌ن
نيليم كي، دئسم گئتمه، دايان، بيلمه‌يه جكسن

كويوندا گؤزوم ياشيني، يوز يول ستميندن
ائتسه‌م يوزه، اي سرو روان، بيلمه‌يه جكسن

سرّ لبيني ديلده نهان ساخلاديم ائلدن
فاش اولمايا، بو رازِ نهان، بيلمه‌يه جكسن

+0 به يه ن

اگر اينسان حكيم اولسا ، اسير روزگار اولماز

بو بئش گون عمره خاطير ، نفس شومه دستيار اولماز

سليمانلار گئديبلر دست خالي قبره دونيادان

نقدير اولسا اينسانين جلالي ، پايدار اولماز

شكوه و فر جاويدان ، فقط مخصوص سبحان دير

اجل حكمي گلنده ، هئچ كسه راه فرار اولماز

بو سؤزلر منتسب دير مكتب شاه ولايتدن

بويوردو ثروت و مكنت دليل افتخار اولماز

بشرده اولسا حريت ، اؤزون دونيايه سينديرماز

شرافتمند اولان اينسان ، قالار آج روشوه خوار اولماز

اگر اينسان بير آز فيكر ائيله سئيدي متن قرآنه

بيلردي هئچ حقيقت پيشه اينسان ظلم كار اولماز

بلاي فقر و نكبت دن قاچيرلار قيزلار ائولردن

مساوات اولسا، عدل اولسا ، بو قدري انتحار اولماز

بو بير امر مسلم دير ، درآمدلر حلال اولسا

بو قدري كوچه و بازارده بي بند و بار اولماز

گلين آي باشرافتلر ، چكيب تخت دن سالاخ فقري

برابر اولسا اينسانلار ، شرافت داغدار اولماز

گئديرسن مكه يه هر ايل ، دئييرسن عاشقم حجه ؟

ولي مين حجه گئتسن ، هئچ بيرينده اعتبار اولماز

تبرا ائيله شيطاندان ، سورا گئت حجه اي حاجي

وگرنه مكه ده شيطانه ، شيطان سنگسار اولماز

اگر مين ايل اوروج توتسان ، همان قرآنه آند اولسون

اگر آج ياتسا بير اينسان ، رضا پروردگار اولماز

غفاري اردبيلي

+0 به يه ن

گوندوز اولوب

قارانليغين آجي دادي هله داماغيمدادي

اومودوم يوخ صاباحا

گون چيخسادا

كؤمورلويو منيمدي!

گؤز ياشلاريم

آخمايين

كيمسه يولونوزو گؤزله مير

اينسانليق حراجيدي

هامي ساتير

آلان يوخ

جانا دويوب

سيزيلتي سسيم دن

قوجا قفس

+0 به يه ن

. بير اليمده داش

... بير اليمده اوره ك

داش اريمه ليدير

يوخسا اوره ييم داش اولاجاق!

ياريم جان بير باليقام

.

.

.

توروندان قاچيرتما مني!

+0 به يه ن

قار كيمي آغ گلديم ،

               لكه سيز گلديم ،

سس سيزجه ياغميشديم يوللارينا من .

من سنين عؤمرونه بلكه سيز گلديم

ييغيلدين گوج كيمي قوللاريما سن ...

بيتدي باخيشلارين نغمه سي ، سؤزو

سوكوت قوللاريندا گزديردي بيزي ...

سويودوق قار كيمي ...

                نه دئييم ،

                دوزدو ،

بلكه بو سويوقلوق بئزديردي بيزي ...

ايندي خاطيره نله ياناجاغام من ،

گولسن ،

                گولوشونه بورونه جه يم .

قار كيمي اووجونا ياغاجايام من ،

قار كيمي اووجوندا ارييه جه يم ! ...

حسرتين قلبيمده دينير تار كيمي ،

نغمه لر دنيزدير ، وصالين قاييق .

سنده آي سئوگيليم ،

                گئتدين قار كيمي

قاييتسان ،

+0 به يه ن

نه بيله يديم بو سئوگينين سوْنو يوْخ

نه بيله يديم دونيا بئله دؤنه جك.

نه بيله يديم سئوگي آدلي بو قوْناق

ايكيميزين آراميزدا اؤله جك ...

اولو سئوگي گؤيدن يئره ائندي مي

نه داياندي يوْلوموزون اوستونده؟

بو محبت سوْيودوقجا، سن دئمه،

جان وئريرميش قوْلوموزون اوستونده.

هر گؤروشه سورونوردو آياقلار

اوْل چمنلر – بير باهارليق چمني

دوْداقلاري يانديراندا دوْداقلار

اوره ييميز اوشويورموش، دئمه لي.

اَيلنجه لر قوْيمادي كي، گؤز آچاق

هر ايسته يي بيز بئله جه بيترديك

پاييز گلدي توْي – بايراملا، بيز آنجاق

يارپاق – يارپاق گونوموزو ايتيرديك.

شيرين اوْلدو يالانلارين زهه ري

حقيقتي گيزله ميشيك هميشه

سئوگيليلر اوْياق آچدي سحري

بيز آخشامي گؤزله ميشيك هميشه ...

يوخو گؤردوك ... گاه گوْرخولو، گاه دا شن،

بوْغدو بيزي ترددودلر آخاري

يوخولاردا اللر گؤردوك بيرلشن

ها يوْزدوقسا هيجران اوْلدو آخيري ...

نه بيله يديك بو سئوگينين سوْنو يوْخ

نه بيله يديك دونيا بئله دؤنه جك

نه بيله يديك سئوگي آدلي بو قوْناق

+0 به يه ن

يئنه ده عؤمروموزو

گول – چيچكلر بزه دي

دونيا كؤهنه دونيادي

سئوگيلري تَزه دي.

گؤروشه گئده ني وار

گؤروشدن گله ني وار

كؤوره ليب آغلاياني

اوره كدن گوله ني وار.

داغلاردا قار اريدي

قيشين اوزو يازادي

دونيا كؤهنه دونيادي

گولوشلري تَزه دي.

چمنلره شئه دوشور

سيرغا تاخير چيچكلر

چيچكلري گول اللر

چمندن دره جكلر.

هر چيچه يين عنواني

بير گول اوزلو قيز آدي

دونيا كؤهنه دونيادي

چيچكلري تَزه دي.

+0 به يه ن

دئدين، سوْن خاطيريم قورو شكيلدي

يازدين، اونوداندا باخارسان آنجاق.

من سني اونوتسام ...

                             دوشوندون مو بير

شكلين سندن اوّل اونودولاجاق ...

بيليرم،

بير داها دؤنمه يه جك سن،

عكسين – يانان عشقين بير اوْووج كولو ...

اؤزون ياد اوره يي دينله يه جك سن،

شكلينسه قلبيمين دؤيونتوسونو.

سني ساخلاماغا چاتمادي گوجوم،

آچيلان نه واختسا سوْلمالي ايميش.

شكليني وره قه كؤچورمك اوچون

آرادا نئقاتيو اوْلمالي ايميش.

بو سوْيوق كاغيذدا سئوينج دوْنوبدور،

كده رين هارداسا يوْل گلير هله.

اوزونه خفيف بير گولوش قوْنوبدور،

هيجرانا باخيرسان سن گوله – گوله ...

بير آنين حؤكمويله دييشير اينسان،

نئجه عزيز ايدي باياق بو شكيل.

سن اؤزون بير سئوگي خومارينداسان،

هميشه اوياقدير،

                             اوْياق بو شكيل.

بير كاغيذ اوستونده دوْنان اوميدين

غملي گؤزلرينده ابدي اوْجاق،

شكلين واختي سايان ياعات كيميدي،