كيمده واردير گؤزليم سنده اولان جاذبه لر

سنه دنياده مگر عاشق اولاندا غم ائلر؟

بس دير اولدورمه يه جكسن گؤزليم دنياني

هر يوزي گؤيچك اولا ندا بوقدر چم خم ائلر

اينجيمه گؤز ياشيم آخسا سني گؤردوكده گولوم

گول آچيل ديكده باهار فصلي بولود شبنم ائلر

ناز و غمزه ن، يئريشين، شوخ باخئشين عالم دير

بيرده زولفون اوزه توكسؤن اودا بير عالم ائلر

حيف سن گزمه ياراشماز سنه بيگانه ايله

او آچيب سريني دونيايه سني محرم ائلر

واحدم عمرومو من عشقيله صرف ايله ميشم

عشق يا اؤلدورر آخير يا مني آدم ائلر

شاعير: علي آقا واحد

موسيقي نشئه سي مين سوگيلي جانانه دگر

اثر ناله ني عارف ايچون جانه دگر

موسيقي اهلينه انصاف ايله قيمت قويماق

لحن داود ايله مين تخت سليمانه دگر

بيخبرلر نه بيلير لهجه خواننده نه دير

اهل حال اولسا، بو سؤز قدرده ميليانه دگر

پرده غم داغيلير تاره دگنده مضراب

طره دلبره هردم نئجه كي شانه دگر

موسيقيله اولار هر خسته يه عالمده علاج

بو طبابت نئچه مين چاره لقمانه دگر

بيزه بو علم حرام اولموش ايدي كئچميشده

يعني شيطان ايشي دير، رخنه سي ايمانه دگر

ياشاشين قرمزي شهرتلي وطن قانوني

بوسخاوت نئچه مين حاتم دورانه دگر

قيلدي هر يئرده بنا موسيقي مكتب لريني

نغمه نين فايده سي ايندي هر انسانه دگر

خلقيميز موسيقي علمين اوخويور مين لر جه

ئولكه ميزچون بو شرف مهر درخشانه دگر

موسيقيله مني دفن ايله سه لر واحد اگر

قبريمين تورپاغي مين روضه رضوانه دگر

شاعير: علي آقا واحد

آخر آغلاتدين مني، بيگانه لر گولسون منه

شمع تك ياخدين مني، پروانه لر گولسون منه

منده يالوارام، گوزون ياديله، پير ميكده

ائيله مست ائتسين مني، مستانه لر گولسون منه

پرتو خورشيد رويين جام مي ايچره گؤروب

آغلارام قوي دوريده پيمانه لر گولسون منه

قورخورام سر دهانين مي ايچيب فاش ائيله يم

مست اولام كيم عارف، ميخانه لر گولسون منه

باغلا اول زنجير زولفونه من سرگشته ني

قويما كيم صحرانشين، ديوانه لر گولسون منه

ليلي وش، زولفوندن آيري ايسته رم مجنون اولام

قوي ائشيتسين بو سؤزي، فرزانه لر گولسون منه

ييخا بيلمزدي فلك اولسايدي ييخدي هجر يار

واحدم قوي ساكن ويرانه لر گولسون منه

علي آقا واحد

گلوبدور تنگه اي ظالم، ستمله قان اولان كونلوم

هميشه باغ وصلينده، گولوب خندان اولان كونلوم

دوشوب مجنون كيمي، صحرايه بير ليلي فراقيندا

بوتون عاشقلر ايچره، منبع عرفان اولان كونلوم

نه اولدو بيلمه ديم دوشدو، جدا گولزار كويوندان

هميشه خوان وصلين بزمينه، مهمان اولان كونلوم

كيمه بيلمم، گئديب اظهار قيلسين محنت عشقين

دؤنوبدور قانه هجرينده غمي پنهان اولان كونلوم

نه چاره ائيله سين، بيلمم خلاص ائتسين اوزون غمدن

اسير محنت و پا بسته هجران اولان كونلوم

اولورمي بير زمان خرم، يئتيشسه وصل جانانه

غم هجرينله افغانلار چكيب، گريان اولان كونلوم

منم فرهاد! عصرين سئوديگي {واحد} گوزللر دير

اودور كي لاله داغين گؤسترير، ويران اولان كونلوم

علي آقا واحد

بوتون گوزلليگي تانريم او سرو نازه وئريب

او هر نه ائتسه طبيعت اونا ايجازه وئريب

اول آهو گؤزلو گؤرخورام مني خطايه سالا

كي، فيتنه سيله چوخ عاشيقلري گودازه وئريب

اَييلدي سجده يه، محراب گؤردو قاشلاريني

اودور كي، اهل ريا مئيليني نمازه وئريب

گولردي قيرخ گوزل عشقيله، آغلاياردي خزر

همين او ذوق صفاني كره آرازه وئريب

جمال يوسيفه جاه و جلال محموده

كمالي معرفتي سرّي وار ايازه وئريب

گوزلليك عالمينين شهرياري دير بو پري

بونا بو سلطنت حسني ايندي تازه وئريب

بو فخريميز بيزه واحد بؤيوك سعادتدير

زمانه، ثروت آغير يوكدور، آنلامازه وئريب

شاعير: علي آقا واحد

زولفونده نه لازيم، گؤزليم، شانه دولانسين؟
قويما او حرمخانه ني بيگانه دولانسين
عيب ايله مه، كويوندا دولانسام گئجه گوندوز
شمعين گرك اطرافينه پروانه دولانسين
ساقي دولانيم باشينا مئي جاميني گزدير
سرمست اولوم، باشيما ميخانه دولانسين
اول زولفه كونول وئرمه، دييرلر منه ال چك
اونسوز نئجه بس بو دل ديوانه دولانسين
مجنون نه برابر منه صحرالره قاچدي
عشق اهلي اودور عرصه ده مردانه دولانسين
اغيار ايله اؤز ياريني همدم گؤرن عاشيق
دوشسون او گرك دشت و بيابانه دولانسين
سرخوش ليق ايله عؤمروني صرف ائيله مه «واحيد»
عارف اونا دييرلر كي، حكيمانه دولانسين
شاعير: علي آقا واحد

اجازه وير باخيـــم، اي گــــل، اوقاره گوزلرينــــه

وورولميشـــام، نه ايديــــم، آشكاره گوزلرينــــه!

غم ايتمه رم منــي يوز دفعه گونده ئولدوره سن

باخانـــدا بيــــرده ديـريللــم دوباره گوزلرينـــــــه!

جمالين آچما گلـم، قورخورام گوروب اوزونـي

گون اولسون حسنينــــه عاشق، ستاره گوزلرينـــه!

اولايدي قسمــــت، ئوپه يديــــم او نازك اللريني

اوركـــدن ايله ميشــــم استخاره گوزلرينــــــــه!

كمنـــد آه ايلـــــه صيادلـــــــر دالينجـــــا دوشــــر

بو ناز ايلـــــه اگر ايتســــــه ن اشاره گوزلرينــه!

گوزوم گوتورمييـر، اغيارلــر باخانــــدا سنـــــه

بير آيـــري گوزلـــــه ايديرلـر نظاره گوزلرينــه!

شكستــــه واحده اولماز طبيــــب لردن عــــــلاج

قالوبدور اينـــــدي سنين بيرجه چاره گوزلرينه! 

شعر: علي آقا واحد

بيــزي مردانــه دوغمشـــدر طبيعــت ابتدا سينـــدان

عدونيــن قورخماريق قانلار توكـن نوك جداسيندان

ئولونجه شكوه يه ديل آچماريق اعداي بي رحمين

اگـر يوز يــول كسيلسـه باشيميـز تيــغ جفاسينــدان

عدولـــر باغرينـــي چاتلاتميشيق ميدان حرب ايچــره

بيز اول فاتحلريـــك حقين ظفرپرور صدا سينــــــدن

شرار تيــــغ ميزدن هر زمان دشمـــن فرار ايتميــش

قاچار خفاش بـــد طينت نيجـــه شمسين ضيا سينـدان

شهيــــد اولمـاق فقط حريــــت اوغروندا سعادتـــــدر

اسارتلـــه حياتيـن بي ثمر ذوق و صفــا سينـــــــــدان

سه ورسه ك كاوه تك آزاده ليــــك، مظلوم دنياني

خلاص ايتمك گره ك ضخاك عصرين هر بلا سيندان

اگر مظلومـــي قورتارماقسا مقصـــد ظلم ظالمدن

گره ك بالمره ييخماق قلعه ي ظلمي بنا سيندان... 

شعر: واحد

چشمين كي آلير ناز ايلــــه جان، شيونــــي نيلـــر؟

مژگانيــــن اوخونــــدان ييخلان شيونـــي نيلــــر؟!

ســــرو چمنــــــه قامتيـــــن افتاده ســـــي باخماز،

محتـــاج تماشاي رخيـــــن گلشنـــــــــي نيلــــــــر!

سن جور ايلــــه من يالواريم حقـــه، سن اينانمــا

تانريم، گورگ آخــــر، سنـــــي نيلـــــر، مني نيلر!

دفن ايله مه، اولســام ســــر كوينــــده شهيــديـــن،

عريـان گـــرگ عاشـــق، كفنــــي، مدفنـــي نيلـــــر!

جــان و تنـــــي نــــذر ايلــــه ميشــــم راه وفـا ده

ياريــن ســه ون عاشـــق داخــي جان و تنــــي نيلر!

غم پيرهنيـــن سيـــل سرشك ايچـــره بوراخديــم

گردابـــــده غـرق اولسا گمـــــي، يلكنــــــي نيلــر!

ئوز دوستي كي، مين جـور ايله دي واحده، گيتي

قيل اينـدي تصــــــور اونـا، گـــور دشمنـــي نيلــر!

واحد

او اينجه، نازلــي باخيشلار، او آتشيــن گوزلـر

حزين- حزين نه باخير، سانكي عاشيقيـن گوزلر

سنين كيمي، گوزه ليم، نازنين گوزه ل چوخـدور

كه يوخدور هيچ بيريسينــده بو نازنين گوزلـر

سنيـن او گوزلرينــي بيرجه يول گوره ن عاشق،

اينان كي، سويله يه جك يوز يول «آفرين گوزلر!»

سورولسامنـدن، اسيــر ايليه ن كيم اولدي سني،

باخوب بو گوزلره عرض ايله رم: «همين گوزلـر»

وفالي اولماسا بير گون ده، چوخ گمان، دوزمــه ز

وفالـــي اولسا، يوز ايل عاشيقيــن يقين گوزلــر

هميشــه شاد اولــورام انتظار وصليــن ايلـــه

نئجــه كي بيــر تازه داماد اولان گليــن گوزلــر

من ئوز نگاريمــي، عيب ايتمه، گوزله سه م، واحد

كي بلبل ئوز گلينــي، عاشــق همدميـــن گوزلـر

شعري از واحد