+0 به يه ن
خان ننه ، هاياندا قالدين
بئله باشيوا دولانيم
نئجه من سني ايتيرديم !
دا سنين تايين تاپيلماز
سن اؤلن گون ، عمه گلدي
مني گه تدي آيري كنده
من اوشاق ، نه آنلايايديم ؟
باشيمي قاتيب اوشاقلار
نئچه گون من اوردا قالديم
قاييديب گلنده ، باخديم
يئريوي ييغيشديريبلار
نه اؤزون ، و نه يئرين وار
« هاني خان ننه م ؟ » سوروشدوم
دئديلر كي : خان ننه ني
آپاريبلا كربلايه
كي شفاسين اوردان آلسين
سفري اوزون سفردير
بيرايكي ايل چكر گلينجه
نئجه آغلارام يانيخلي
نئچه گون ائله چيغيرديم
كي سه سيم ، سينم توتولدو
او ، من اولماسام يانيندا
اؤزي هئچ يئره گئده نمه ز
بو سفر نولوبدو ، من سيز
اؤزو تك قويوب گئديبدير ؟
هاميدان آجيق ائده ر كن
هامييا آجيقلي باخديم
سونرا باشلاديم كي : منده
گئديره م اونون دالينجا
دئديلر : سنين كي تئزدير
امامين مزاري اوسته
اوشاغي آپارماق اولماز
سن اوخي ، قرآني تئز چيخ
سن اوني چيخينجا بلكه
گله خان ننه سفردن
ته له سيك روانلاماقدا
اوخويوب قرآني چيخديم
كي يازيم سنه : گل ايندي
داها چيخميشام قرآني
منه سوقت آل گلنده
آما هر كاغاذ يازاندا
آقامين گؤزو دولاردي
سنده كي گليب چيخمادين
نئچه ايل بو اينتظارلا
گوني ، هفته ني سايارديم
تا ياواش – ياواش گؤز آچديم
آنلاديم كي ، سن اؤلوبسن !
بيله بيلمييه هنوزدا
اوره گيمده بير ايتيك وار
گؤزوم آختارار هميشه
نه ياماندي بو ايتيكلر
خان ننه جانيم ، نوليدي
سني بيرده من تاپايديم
او آياقلار اوسته ، بيرده
دؤشه نيب بير آغلايايديم
قولي حلقه سالميش ايپ تك
او آياغي باغليايديم
كي داها گئده نمييه يدين
گئجه لر ياتاندا ، سن ده
مني قوينونا آلاردين
نئجه باغريوا باساردين
قولون اوسته گاه سالاردين
آجي دونياني آتاركن
ايكيميز شيرين ياتارديق
يوخودا ( لولي ) آتاركن
سني من بلشديره رديم
گئجه لي ، سو قيزديراردين
اؤزووي تميزليه ردين
گئنه ده مني اؤپه ردين
هئچ منه آجيقلامازدين
ساواشان منه كيم اولسون
سن منه هاوار دوراردين
مني ، سن آنام دؤيه نده
قاپيب آرادان چيخاردين
ائله ايستيليك او ايسته ك
داها كيمسه ده اولورمو ؟
اوره گيم دئيير كي : يوخ – يوخ
او ده رين صفالي ايسته ك
منيم او عزيزليغيم تك
سنيله گئديب ، توكندي
خان ننه اؤزون دئييردين
كي سنه : بهشت ده ، الله
وئره جه ك نه ايستيور سن
بو سؤزون ياديندا قالسين
منه قوليني وئريبسه ن
ائله بير گونوم اولورسا
بيليرسن نه ايستيه رم من ؟
سؤزيمه درست قولاق وئر :
سن ايله ن اوشاخليق عهدين
خان ننه آمان ، نوليدي
بير اوشاخليغي تاپايديم
بيرده من سنه چاتايديم
سنيلن قوجاقلاشايديم
سنيلن بير آغلاشايديم
يئنيدن اوشاق اولوركن
قوجاغيندا بير ياتايديم
ائله بير بهشت اولورس
داها من اؤز الله هيمدان
باشقا بير شئي ايسته مزديم
آچار سؤزلر :
شعر,
