+0 به يه ن

اونوت دئدیلر
بیلمه دیلر دونیانین ان زور ایشی
اونوتماقدیر
داها عاشیق اولماماغیما امینم
سنی اونوتماماق کیمی

یازیلیشدیقلاریمیزی سیلدیم
داها نه فیس بوکدا مئساژلارین قالیر 
نه موبایلیم دا

هامی بو سئوگینین یانلیش اولماغین دئییر
نه یازیق
آلیشان اورکدیر
دیل قانمیر

سندن منه 
یانلیزلیق یوکو قالیب
عمر بویو اونو چکمه لییم
اورییم اوسته 
گیریش یاساق تابلوسو اکیرم
داها کیمسه نی یول وئرمه یه جه یم
سئومک منه یاساق دیر یاساق

بیلمیرم نئچه ایل سونرا
سنه وئردیگیم یادگارلارا باخاندا
نه دئیه جک سن
بلکه دئیه سن بو قیز منی سئویردی ها
بلکه ده هئچ یادیندا اولمایام
اما سندن قالان آنی لاری 
اونودا بیله رم می؟

هر نه بیتدی
داها سنی سئومک یانلیش دیر یانلیش
قان سانا اورک قان سانا
بو سنی دوشونوب سون یازدیغیم شعردیر
بو گئجه یاخین یولداشلار لیسته سیندن ده 
آدینی چیخارداجاغام
تانری امانیندا
الوداع الوداع!

+0 به يه ن

ساقیا دولدور قدح چون یئتدی فصل نو باهار

مرغزار اولدی چمن سویله ر چمنده مرغ زار

گول چمنده پادشاه اولدی بزتدی مجلسی

لاله گلدی قوللوغا توتدی شراب خوشگوار

صبحدم بستانه ساری گل گشت اوچون عزم ائیله دیم

باغچادا گوردوم کی چیخمیش بیر حبیب گلعذار

دیشی اینجو، گوزی جادو، خالی هندو، بئلی مو

ساچی سنبل، خالی فلفل، اوزی چون گل، آغزی دار

خوب منظر، گوزی کافر، کیپریگی خنجر، قاشی یای

قد صنوبر، بویی عرعر، لاله ی تر، شول نگار

یوزی نون و گوزی عین و اوزی ری قامت الف

ساچی جیم و خالی میم و یوزی نقطه خط غبار

دلبریم بیر قیل بهاسی قیمتی دورد اقلیمه

بیری مصره، بیری چین و بیری هند و بیری لار

معرفتدن کوثر اولدی هم «نسیمی» چاکری

نسبتی یوخدور اونونلا عین دین و اختیار


نسیمی