ايندي بير باشقا زاماندير بوتون اينسان دانيشير
وارليغين جار ائله‌يير عالم ايمكان دانيشير
من نييه سوسمالييام حاققيمي بيگانه يئيه
من واريمدان دئمه‌سم چوخ‌لاري يوخدان دانيشير
من او خالقام كي، منيم يوردوم آلوولار يئري‌دير
آراسان تورپاغيمي اوددان آلوودان دانيشير
من كوراوغلو يئتيريب ظاليمي محو ائيله‌ميشم
يئري گلسه قيليجيم دوشمانا قان-قان دانيشير
قهرامان بابكيمين شؤهرتي آفاقي توتوب
اوخوسان تاريخيمين هر واراغي شان دانيشير
نبيمين آدي گلنده گئنه بي لر اوشه نير
او قوچاغدان هله ده خان ايله سولطان دانيشير
من او خالقام كي فيضولي منيم ائولاديم اولوب
بونو تك من دئميرم گور نئچه ديوان دانيشير
من نيظامي كيمي اعجاز ائله ين ميللتي ام
خور باخان‌لار هله بو حق سؤزه بؤهتان دانيشير
سيغمايان هر ايكي دونيايه نسيمي ده منم
گؤر نه گؤزدن باخير او خيلقته هاردان دانيشير
من او يوردام كي منيم واحيديمين يوخدو تايي
چوخ درين سؤزلري او ساده و آسان دانيشير
من او خالقام كي جاهان اهلي سئوير موسيقيمي
من‌ده شؤوكت له سارا جاببار ايله خان دانيشير
دف ايله تار و كامان ساز ايله سؤزله بالابان
ناغارا، زورنا، توتك سئوملي قارمان دانيشير
بو نيشان‌لار كي دئدين وصفينه "زاهيد" بيلديك
بو شيرين ديل له بيزه آذربايجان دانيشير
