باخیش
دوشنبه 15 دی 1393
بؤلوم | آنايوردوم یازار : ساراي
+0 به يه ن


دونیا قرار توتوب ساکین اولاندا
چوخ بلالر چکیب باشین،قاراداغ

آلنینداکی هر ایز بیر قرینه دیر
بیلینمز تاریخین، یاشین، قاراداغ

اورکدن چکدیگین فریادی،آهدی
دیله یین،ایسته یین خالقا آگاهدی

هر قایان دؤیوشده بیر قرارگاهدی
سویله یر تورپاغین،داشین،قاراداغ

خایین حکمدارلار دیلین باغلاییب
ائلینه اود ووروب،سینه ن داغلاییب

قلبین دیله گلیب،گؤزون آغلاییب
آخیب گول اوزونه یاشین،قاراداغ

چوخو تاج بیندی،سئودی شهرتی
اونلارین قان ایچمک اولدو عادتی

ازلدن سئومیسن سن حورییتی
چاتیلیب حسرتله قاشین،قاراداغ

تبریز بیر آنادیر سن ده اوغلوسان
ائل بیلیر اورکدن اونا باغلیسان

ستارخان کؤچه لی سینه داغلیسان
اودورکی آغاریب باشین قاراداغ

یئنه گونش دوغار،قیزار تورپاغین
یاشیل دون گئیینه لر،گول آچار باغین

اوغولون ستارخاندان قالان بایراغین
اوجالداجاق سلاح داشین،قاراداغ

ائللرین بیر زامان اوجالار سسی
اوخونار یوردومدا ظفر نغمه سی

اؤپه نده گونشین ایستی نفسی
قیزینار گدیین،قاشین قاراداغ

گولر هر بیر داشین،هر بیر اویلاغین
سردارلار یئتیرر آنا تورپاغین

"جاوان حسین" الده توتار یاراغین
قورخماز دونیا اولسا قوشون،قاراداغ .