+0 به يه ن
گئديب اي يازيق ديلنچي، قاپيسيندا دور علي نين…
علي اي هماي رحمت، علم ائيله دين خداني
او هماكي سايه سينده، ائده حفظ ماسواني
كونول ايسته سن خداني بيله سن علي ني ياد ائت
تانيديم علي ني وآللاه، تانيديم او دم خداني
ايكي دونيادا فنادن بير اثر بئله تاپيلماز
اگر اوز الينه آلسا، علي چشمه ي بقاني
سوچيله دويونجا رحمت بولوتي كي بو جهنم
غضب آتشينده يوخسا، كوله دوندرر جهاني
گئديب اي يازيق ديلنچي، قاپيسيندا دور علي نين
كي اوزوك وئيرر شاه ائيلر، كرميله هر گداني
علي دن ساواي كيمدن، ائله بير اوغول دوغولموش
كي تانيديرا جهاندا، شهداي كربلاني
ائدر عهد دوستا قوربان، وئره واريوخون رفيقه
فقط هانسي دوست علي تك، ائدر عهدينه وفاني؟
دئيه بيلمه رم خدادير،بشر آد وئرم خطادير
چاغيريم نه آدلا بيلمم، شه ملك لا فتاني
قان آخير ايك گوزومدن، تلس اي نسيم رحمت
اونون آستانيندان آل سن منه خاك توتياني
اواوميديله آياغين توزونو زيارت ائتسين
قاپينا اوره ك سوزومله يولا سالميشام صباني
سن علي قضا سووانسان، بيزي دينله بينوايق
اوزاق ايله جانيميزدان كرميله هر قضاني
اونون عشقي ايله نئي تك نئجه من گليم نوايه
كي لسان غيب خوشدور ائده ورد بو نواني
گئجه صبحه دك اوميديم بونادير سحر نسيمي
وئره آشنا پيامي، ائده شاد آشناني
قولاق آس گئجه او ياحق، قوشونا كي شهريارا
بيله سن نه خوشدور آچماق، گئجه دوستا ماجراني
