سالدي هيجران اودونا اول بت مه پاره مني

ائيله دي زولفوتك هيجرينده گونو قاره مني

درد طغيانيمه بيجا يئره زحمت چكمه

تاري شاهددي طبيب اؤلدورو بو ياره مني

قيلدي كونلوم قوشونو حلقه زولفونده اسير

وار خيالي چكه منصور كيمي داره مني

سركويوندا وطن قيلميش ايديم ديلدارين

اوزدو وصليندن اليم ائيله دي آواره مني

من تك عالمده غم و درده گرفتار اولسون

كيم كي حسرت قويوب اول مهوش دلداره مني

سن بو حسنيله زليخاي جهانسان اي مه

نولا عشقين چكه يوسف كيمي بازاره مني

واحدا زولف نيگاريم اينجه لدي تنيم

كيم گؤرو بنزه دير اول زولفده بير تاره مني

شاعير: علي آقا واحد