+0 به يه ن
آيريليق تا كي ساليب آه و فغان ايچره مني
گؤز ياشي رسواي ائديب خلق جهان ايچره مني
عكس رخساريوه باخديقجا اورهك قانه دؤنور
يانديرير باغريمي هردم بو روان ايچره مني
سيغمايير جيسميمه كؤنلوم داراليب باغريمدا
حسرتين دوستاق ائديب چونكي زامان ايچره مني
لامكان اولموش ازلدن بو حقيقتدير كي
سالدي مستانه بلايه بو مكان ايچره مني
چونكي دوشدوم بو مكانه باشيما گلدي بلا
آرديجيل سالمادادير گؤر نئجه قان ايچره مني
منده دير جمله علامتلري سبحانيميزين
سالاجاقدير بو علايم طيران ايچره مني
چون منه صورت رحمانيني وئرميشدي حبيب
سجده يه دوشدو ملك گؤرجگي جان ايچره مني
وصلينه يئتمك ايچون پرده لري وارسا منيم
آيتكين حق بولاجاق سرّ نهان ايچره مني
آچار سؤزلر :
آیریلیق,
